គូឯកខ្សែក្រវាត់ពិភពលោកនេះ ចាន់ រតនា និង សុខ ធី យក​ម្នាក់​នេះ​ដូចគ្នា

ម្ចាស់​ខ្សែ​ក្រវាត់​គុន​ចម្រុះ​ពិភព​លោក​របស់​ចិន  Xiong Jing Nan ​ត្រូវ​ឡើង​ការពារ​ខ្សែ​ក្រវាត់​របស់​ខ្លួន​ទល់​នឹង​ជើង​ខ្លាំង​​គុន​ចម្រុះ​ជប៉ុន  Ayaka Miura នា​ថ្ងៃ​សុក្រ ទី​១៤ ខែ​មករា​នេះ នៅ​ប្រទេស​សិង្ហបុរី។

អ្នក​លេង​គុន​ខ្មែរ​លេច​ធ្លោ​នៅ​ប្រទេស​ថៃ សុខ ធី និង​អ្នក​លេង​គុន​ចម្រុះ​លេខ​១​កម្ពុជា ចាន់ រតនា សុទ្ធ តែ​ចាប់​អារម្មណ៍ និង​គិត​ថា កីឡាការិនី​ចិន​នឹង​ការពារ​ខ្សែ​ក្រវាត់​ពិភព​លោក​របស់​ខ្លួន​បាន​ជោគជ័យ​បន្ត​ទៀត។

សុខ ធី បាន​និយាយ​ថា ៖«បាទ ខ្ញុំ​គិត​ថា Xiong Jing Nan នឹង​ឈ្នះ​រក្សា​ខ្សែ​ក្រវាត់​នៅ​ដដែល ពី​ព្រោះ​គាត់​​មាន​បទ​ពិសោធ​ច្រើន។ ជា​ណិសេស​គាត់​ខ្លាំង រឹង និង​មាន​ជំនាញ​វ៉ៃ​ឈរ​ល្អ​ណាស់។ ចំពោះ Ayaka ខ្ញុំ​មិន​សូវ​ស្គាល់​ច្បាស់​ទេ តែ​ធ្លាប់​ឃើញ​គាត់​វ៉ៃ​គឺ​ល្អ​ក្បាច់​ក្រោម តែ​កីឡាការិនី​ចិន​ធ្លាប់​ជួប​អ្នក​ខ្លាំង​ជំនាញ​ក្រោម​ច្រើន​ហើយ»។

ចំពោះ​ជើង​ខ្លាំង ចាន់ រនតា បាន​និយាយ​ថា ៖«ខ្ញុំ​មិន​ស្គាល់​ច្បាស់​ពី​កីឡាការិនី​ជប៉ុន​ Ayaka ទេ តែ​បាន​មើល​វីដេអូ​ប្រកួត​របស់​គាត់។ គាត់​នៅ​ក្មេង និង​ល្អ​ជំនាញ​ក្រោម តែ​មិន​ពូកែ​វ៉ៃ​ឈរ​ដូច​ជា​កណ្តាប់​ដៃ​ទេ។ Xiong Jing Nan ជា​កីឡាការិនី​ដ៏​អស្ចារ្យ បទ​ពិសោធ​ច្រើន និង​​ជំនាញ​វ៉ៃ​ឈរ​គ្រោះ​​ថ្នាក់​ខ្លាំង​ណាស់។ ខ្ញុំ​គិត​ថា Xiong នឹង​ឈ្នះ»។

សូម​បញ្ជាក់​ថា កីឡាការិនី​ចិន Xiong Jing Nan ចាប់​តាំង​ពីឈ្នះ​ខ្សែ​ក្រវាត់​គុន​ចម្រុះ​ពិភព​លោក​កាល​ពី​ឆ្នាំ​២០១៨​មក នាង​​បាន​ឡើង​ការពារ​ខ្សែ​ក្រវាត់​នេះ​ជោគជ័យ​៥​ដង​ហើយ ហើយ​​ថ្ងៃ​សុក្រ​​នេះ​ជា​ការ​ឡើង​ការ​ពារ​លើក​ទី​៦។

ចំណែក​កីឡាការិនី​ជប៉ុន Ayaka Miura ធ្លាប់​ប្រកួត​បាន​១៤​ដង ក្នុង​នោះ​ឈ្នះ​១១​ដង ហើយ​នេះ​ជា​ឱកាសដំបូង​ដែល​នាង​ឡើង​ប្រកួត​ដណ្តើម​ខ្សែ​ក្រវាត់​ពិភព​លោក៕

  • ភ្ជាប់ទំនាក់ទំនងជាមួយ SPORTREFRESH