សុខ ធី ប្រាប់មូលហេតុធ្វើឲ្យរូបគេខ្លាំងមួយរយៈចុងក្រោយ

តាម​រយៈ​ជ័យជម្នះ​២លើក​ជាប់​គ្នា​លើ​ជើង​ខ្លាំង​ថៃ​ក្នុង​ប៉ុន្មាន​ខែ​ចុង​ក្រោយ​នេះ សុខ ធី ត្រូវ​បាន​គេ​មើល​ឃើញ​សមត្ថភាព​ឡើង​ខ្លាំងជាង​មុន​ៗ។

ប្រទេស​ថៃ​ទើប​បើក​ឲ្យ​មាន​ការ​ប្រកួត​វិញប៉ុន្មាន​ខែ​ចុង​ក្រោយ​នេះ​ ប៉ុន្តែ​បិទ​ទ្វារ​គ្មាន​អ្នក​ចូល​ទស្សនា ដោយ​សារ​វិបត្តិ​កូវីដ-១៩​រាត​ត្បាត​ខ្លាំង​​។ ជា​មួយ​គ្នា អ្នក​លេង​គុន​ខ្មែរ សុខ ធី ក៏​បាន​ឡើង​ប្រកួត​២​លើក​ហើយ និង​ទទួល​បាន​ជ័យជម្នះ​ទាំង​ពីរ​លើក។

លើក​ទី​១ កាល​ពី​ខែ​តុលា សុខ ធី បាន​ប្រកួត​សង​សឹក​បាន​សម្រេច​លើ​កីឡាករ​ថៃ​ដែល​រូប​គេ​ធ្លាប់​ចាញ់​ម្តង និង​លើក​ទី២​នា​ដើម​ខែ​មករា​នេះ រូប​គេ​បាន​ផ្តួល​កីឡាករ​ថៃ ឌីសែលណយ ឲ្យ​លោក​អាជ្ញា​កណ្តាល​បញ្ឈប់​ក្នុង​ទឹក​ទី​៤​សម្រាប់​ការ​ប្រកួត​នៅ​ប្រទេស​ថៃ។

សម្រាប់​ជ័យជម្នះទាំង​នេះ​ត្រូវ​បាន​អ្នក​លេង​គុន​ខ្មែរ​ប្រាប់​ថា កត្តាតែ​ម្យ៉ាង​គត់​គឺ​កូន។ សុខ ធី និយាយ​ថា ៖«កូន​ខ្ញុំ​ជា​កម្លាំង​ជំរុញ​ទឹក​ចិត្ត​យ៉ាង​ខ្លាំង។ ខ្ញុំ​បាន​ខំ​ប្រឹង​ហ្វឹក​ហាត់​ខ្លាំង​ជាង​មុន។ ទៅ​ណា​មក​ណា នឹក​ឃើញ​កូន​រហូត។ ខ្ញុំ​ចង់​មាន​ផ្ទះ​ឲ្យកូន​រស់​នៅ​ដូច​គេ»។

មែន​ហើយ សុខ ធី មាន​ភរិយា​ជា​ជន​ជាតិ​ថៃ ប៉ុន្តែ​រូប​គេ​ស្នាក់​នៅ​ផ្ទះ​ជួល ដូច្នេះ​នៅ​ពេល​រូប​គេ​ទទួល​បាន​កូន​ប្រុស​ជា​ចំណង​ដៃ​បាន​ធ្វើ​ឲ្យ​មាន​កម្លាំង​ចិត្ត និង​ចង់​ឃើញ​អនាគត​កូន​ល្អ​ប្រសើរ៕

  • អត្ថ​បទ​ទាក់​ទង

    ភ្ជាប់ទំនាក់ទំនងជាមួយ SPORTREFRESH