ជើងឯកពិភពលោកទម្ងន់​យក្ស​ Oleksandr ចូល​ធ្វើទាហានតស៊ូ​ជាមួយរុស្ស៊ី

កីឡាករ Oleksandr Usyk ដែល​ជា​ជើង​ឯក​ប្រដាល់​សកល​ទម្ងន់​ធ្ងន់​ពិភព​លោក​ពីរ​ប្រភេទ​ទម្ងន់​​របស់​ប្រទេស​អ៊ុយក្រែន​បាន​ចូល​បម្រើ​កង​ទ័ព​ហើយ​នៅ​ពេល​ប្រទេស​មួយ​នេះ​កំពុង​ទទួល​រង​ការ​វាយ​ប្រហារ​យ៉ាង​ធ្ងន់​ធ្ងរ​ពី​ប្រទេស​រុស្ស៊ី។

កីឡាករ Oleksandr Usyk

រហូត​ដល់​ពេល​នេះ​ រុស្ស៊ី​បាន​វាយ​ប្រហារ​លើ​​អ៊ុយក្រែន​ឈានចូល​ដល់​ថ្ងៃ​ទី​៥ ហើយ និង​មិន​ទាន់​មាន​ដំណោះ​ស្រាយ​​ណា​មួយ​ដើម្បី​ផ្អាក ឬ​បញ្ឈប់​សង្គ្រាម​ដ៏​សាហាវ​​ឡើយ បើ​ទោះ​ជា​ភាគី​ទាំង​ពីរបាន​ជួប​ចរចា​គ្នា​កាល​ពី​ថ្ងៃ​ចន្ទ​ម្សិល​ម្សិល​មិញ។

ស្រប​ពេល​រុស្ស៊ីកំពុង​វាយ​ប្រហារ​យ៉ាង​ខ្លាំង អ៊ុយក្រែន​ក៏​បាន​កំពុង​ទប់​ទល់​ដើម្បី​ការពារ​ប្រទេស​ជាតិ។ ដើម្បី​ត្រៀម​ខ្លួន​កម្លាំង​ការពារ​នេះ ប្រទេសអតីត​សហ​ភាព​សូវៀត​មួយ​នេះ​បាន​កំពុង​កេន​ប្រជា​ជន​ឲ្យ​ចូល​បម្រើ​កង​ទ័ព​ទាំង​បុរស​ និង​ស្ត្រី​ឲ្យ​តែ​គ្រប់​អាយុ​១៨​ឆ្នាំ​ឡើង។

កីឡាករ Oleksandr Usyk ធ្វើទាហាន

ជា​មួយ​គ្នា​នេះ អ្នក​ប្រដាល់​អ៊ុយក្រែន Oleksandr Usyk ក៏​បាន​ចូល​បម្រើ​កង​ទ័ព​ដូច​ជា​ពលរដ្ឋ​ផ្សេង​ៗ​ទៀត​។ ការ​ចូល​បម្រើ​កង​ទ័ព​នេះ​ដូចអតីត​ជើង​ឯក​ពិភព​លោក​ទម្ងន់​ធ្ងន់​ទាំង​ពីរ​ដែល​ជា​បង​ប្អូន​បង្កើត​គឺ Wladimir និង​ Vitali Klitschko ក៏​បាន​ចូល​បម្រើ​កង​ទ័ព​ដើម្បី​តទល់​នឹង​កម្លាំង​រុស្ស៊ី។

កីឡាករ Usyk ទទួល​បាន​ការ​ចាប់​អារម្មណ៍​ខ្លាំង​ទូទាំង​ពិភព​លោក​នៅ​ពេល​ដែល​រូប​គេ​ត្រូវ​បាន​ផ្គូ​ផ្គង​ឲ្យ​ប្រកួត​ឈ្នះ​​ជើង​ខ្លាំង​អង់គ្លេស Anthony Joshua ​កាល​ពី​ឆ្នាំ​២០២១ និង​ទទួល​បាន​ខ្សែ​ក្រវាត់​ពិភព​លោក​២​គ្រឿង។​

កីឡាករ​បាន​និយាយ​ថា ៖«ខ្ញុំ​ពិត​ជម្នះ​នឹង​អារម្មណ៍​រំជើប​រំជួល ហើយ​ខ្ញុំ​ពិត​ជា​បារម្ភ​ពី​ប្រទេស និង​ប្រជាជន​របស់​យើង​ណាស់។ មិត្ត​ទាំង​អស់​គ្នា យើង​ត្រូវ​តែ​បញ្ឈប់​សង្គ្រាម​នេះ ហើយ​យើង​ត្រូវ​តែ​រួម​ដៃ​គ្នា»។

កីឡាករ Oleksandr Usyk ពេល​ប្រកួត​ជា​មួយAnthony Joshua ​

រហូត​ដល់​ពេល​នេះ Usyk អាយុ​៣៥​ឆ្នាំ មិន​ទាន់​ស្គាល់​បរាជ័យ​ម្តង​ណា​ឡើយ​ក្នុង​ការ​ឡើង​សង្វៀន​អាជីព​១៩​ដង​គឺ​ឈ្នះ​​ទាំង​១៩​ដង ហើយ​កំពុង​គ្រប់​គ្រង​ខ្សែ​ក្រវាត់ពិភព​លោក WBA (Super), IBF, WBO និង IBO៕

ប្រែ​សម្រួល៖ ពុទ្ធិគុណ
ប្រភព៖ Dailymail

  • ភ្ជាប់ទំនាក់ទំនងជាមួយ SPORTREFRESH