នេះប្រាក់រង្វាន់ជើងឯក និងតម្លៃខ្លួនប្រកួតខ្សែក្រវាត់នៅ TVK Fighter

ថ្វី​ត្បិត​សង្វៀន​ទើប​បើក​ដំណើរ​ក្រោយ​គេ ប៉ុន្តែ​ប្រាក់​រង្វាន់​​ខ្សែ​ក្រវាត់ និង​តម្លៃ​ខ្លួន​គូ​ប្រកួត​​ឡើង​ប្រកួត​ខ្សែ​ក្រវាត់​ក៏​មិន​ខុស​ពី​សង្វៀន​​ផ្សេង​ៗ​ទៀត​ដែរ។

តាម​ការ​ឲ្យ​ដឹង​ពី​អ្នក​ជិត​ស្និទ្ធ​នឹង​សង្វៀន​ប្រដាល់ TVK Fighter ថា សម្រាប់​​កីឡាករ​ដែល​ឈ្នះ​ខ្សែ​ក្រវាត់​ TVK Fighter នឹង​ទទួល​បាន​ប្រាក់​រង្វាន់​ចំនួន​៥​ពាន់​ដុល្លារ​អាមេរិក។ ចំណែក​តម្លៃ​ខ្លួន​កីឡាករ​ឡើង​ប្រកួត​ខ្សែ​ក្រវាត់​​ចាប់​ពី​វគ្គ​ដំបូង​ទៅ អ្នក​ឈ្នះ​ទទួល​បាន​​តម្លៃ​ខ្លួន​​៣៥០​ដុល្លារ​អាមេរិក និង​អ្នក​ចាញ់​ទទួល​បាន​៣០០​ដុល្លារ​អាមេរិក។

សង្វៀន​ TVK Fighter របស់​ទូរទស្សន៍​ជាតិ​កម្ពុជា​បាន​ចាប់​ផ្តើម​យុទ្ធនាការណ៍​ប្រកួត​ដណ្តើម​ខ្សែ​ក្រវាត់​ហើយ​ដែល​រដូវ​កាល​ដំបូង​នេះ​ប្រជុំ​ដោយ​ជើង​ខ្លាំង​ទម្ងន់​​៥៧​គីឡូក្រាម។ ជើង​ខ្លាំង​ទាំង​៨​រូប​ត្រូវ​បាន​បែង​ចែក​ជា​ពីរ​ពូល ក្នុង​មួយ​ពូល​មាន​បេក្ខភាព​៤​រូប។ សម្រាប់​ពូល​ A មាន​កីឡាករ ឃួន ឡាំកូស៊ីន, ជ័យ គឹមហុង, សាន្ត វាសនា និង យ៉ន ពិសី ខណៈ​ពូល B មាន​កីឡាករ ថេនខាំ កូន​ខ្លា, ធន់ អៀងឡេង, សូដា សុភាព និង​ បាន លីម។

រូប​មន្ត​នៃ​ការ​ប្រកួត​គឺ​វិល​ជុំ​សន្សំ​ពិន្ទុ​ក្នុង​ពូល​ កីឡាករ​​ណា​​ដែល​មាន​ពិន្ទុ​ខ្ពស់​ជាង​គេ​ពោល​គឺ​​លេខ​១ និង​លេខ​២​ក្នុង​ពូល​នីមួយ​ៗ​នឹង​ឡើង​ទៅ​វគ្គ​ពាក់​កណ្តាល​ផ្តាច់​ព្រ័ត្រ មុន​ពេល​រក​ឃើញ​ជើង​ខ្លាំង​ឡើង​ទៅ​វគ្គ​ផ្តាច់​ព្រ័ត្រ។

សង្វៀន​ថ្មី​នេះ​ក៏​ជា​ផ្នែក​មួយ​នៃ​ការ​បណ្តុះ​បណ្តាល​ធន​ធាន​កីឡាករ​ប្រដាល់​គុន​ខ្មែរ និង​ជួយ​ធ្វើ​ឲ្យ​កីឡាករ កីឡាការិនី​មាន​ទី​ផ្សារ​កាន់​តែ​ច្រើន​ក្នុង​ការ​ឡើង​ប្រកួត​ ក៏​ដូច​ជា​ទទួល​បាន​ប្រាក់​ចំណូល​ដើម្បី​​ចិញ្ចឹម​គ្រួសារ។

ការ​ប្រកួត​នឹង​ចាប់​ផ្តើម​នៅ​ថ្ងៃ​ទី​១០ ខែ​មីនា ខាង​មុខ​នេះ​នៅ​ស្ថានីយ៍​ទូរទស្សន៍​ជាតិ​កម្ពុជា ក្នុង​រាជ​ធានី​ភ្នំពេញ។ ការ​ប្រកួត​រាល់​ថ្ងៃទី១០ និង​ថ្ងៃ២៤ នៃខែនីមួយ​ៗ៕

អត្ថបទ៖ ពុទ្ធិគុណ

  • អត្ថ​បទ​ទាក់​ទង

    ភ្ជាប់ទំនាក់ទំនងជាមួយ SPORTREFRESH