Eko Roni និយាយថា នឹងឃ្លេ ចាន់ រតនា លើកទង់សចុះចាញ់

អ្នក​លេង​គុន​ចម្រុះ​ឥណ្ឌូណេស៊ី Eko Roni Saputra បាន​លើក​ឡើង​ថា រូប​គេ​នឹង​ប្រើ​ជំនាញ​ចំបាប់​របស់​ខ្លួន​ដើម្បី​ឃ្លេ​អ្នក​លេង​គុន​ចម្រុះ​កម្ពុជា ចាន់ រតនា ឲ្យ​ចុះ​ចាញ់ នៅ​ពេល​អ្នក​ទាំង​ពីរ​ត្រូវ​ជួប​គ្នា​ក្នុង​ព្រឹត្តិការណ៍​ផ្សាយ​ផ្ទាល់ ONE: LIGHT OUT នាថ្ងៃ​សុក្រ ទី​១១ ខែ​មីនា​នេះ។

Eko Roni បាន​និយាយ​ថា ៖«ខ្ញុំ​មិន​ភ័យ​ខ្លាច​ក្បាច់​គុន​ខ្មែរ​​របស់​ ចាន់ រតនា។ គោល​បំណង​របស់​ខ្ញុំ​គឺ​​ប្រើ​ក្បាច់​ចំបាប់​ពិសេស​របស់​ខ្ញុំ​ដើម្បីឃ្លេ​ រតនា ឲ្យ​ចុះ​ចាញ់។ ខ្ញុំ​នឹងមិន​ប្រឹង​សម្រុក​ខ្លាំង​ភ្លាម​ៗ​ទេ តែ​ខ្ញុំ​​នឹង​បញ្ឈប់​គាត់​ពាក់​កណ្តាលផ្លូវ មិន​ថាឃ្លេ​ឲ្យ​ចុះ​ចាញ់ ឬ​ក៏​​ផ្តួល​​ឲ្យ​សន្លប់​នោះ​ទេ»។

ទោះ​បី​ជា​​យ៉ាងណា អ្នក​លេង​គុន​ចម្រុះ​ឥណ្ឌូណេស៊ី​រូប​គិត​ថា អ្នក​លេង​គុន​ខ្មែរ​រូប​នេះ​នឹង​ក្លាយ​ជា​ដៃ​គូ​តឹង​តែង​បំផុត​ក្នុង​អាជីព​គុន​ចម្រុះ​របស់​ខ្លួន។ សម្រាប់​ការ​ប្រកួត​នេះ​លើក​នេះ ប្រសិន​បើ​រូប​គេ​ឈ្នះ​នឹង​ឡើង​ទៅ​កាន់​កំពូល​តារាង​នៃ​ប្រភេទ​ទម្ងន់​របស់​ខ្លួន។

«បើ​ខ្ញុំ​ទទួល​បាន​ជ័យជម្នះ ខ្ញុំ​​ចង់​​ឡើង​ទៅ​កាន់​ក្នុង​ចំណោម​កីឡាករ​កំពូល​ខ្លាំង​ទាំង​៥​រូប​នៃ​ប្រភេទ​ទម្ងន់ flyweight។ ខ្ញុំ​រក្សា​ជ័យជម្នះ​របស់​ខ្ញុំ​បន្ត​ទៀត ហើយ​ជឿ​ថា ពីរ​ប្រកួត រាប់​ទាំង​ ការ​ប្រកួត​ជា​មួយ រតនា​ ផង ខ្ញុំ​នឹង​ឡើង​ទៅ​កាន់​កំពូល​តារាង​ទាំង​៥​រូប»។ Eko Roni បាន​និយាយ។

ថ្វី​បើ​រូប​គេ​ជា​កីឡាករ​ឥណ្ឌូណេស៊ី និង​មាន​ពីរ​នាក់​រួច​មក​ហើយ​ដែល​ធ្លាប់​ចាញ់ អ្នក​លេង​គុន​ខ្មែរ ប៉ុន្តែ​រូប​គេគ្មាន​ចេតនា​សង​សឹក​ឲ្យ​មិត្ត​រួម​ជាតិ​ឡើយ។ កីឡាករ​បាន​និយាយ​ថា ៖«ខ្ញុំ​ដឹង​ថា មិត្ត​រួម​ជាតិ​ខ្ញុំ​២​រូប​បាន​ចាញ់ រតនា ប៉ុន្តែ​ការ​ប្រកួត​នេះ​មិន​មែន​ជា​ការ​សង​សឹក​ទេ។ វា​ជា​ការ​ប្រកួត​រវាង​ខ្ញុំ​ និង​ ចាន់ រតនា ប៉ុណ្ណោះ»៕

  • ភ្ជាប់ទំនាក់ទំនងជាមួយ SPORTREFRESH