Rooney ​​យល់​ថា Pogba ​​ដល់​ពេល​​ត្រូវ​ចាក​ចេញ​ពី Man Utd ហើយ

Wayne Rooney ​​វីរបុរស​ក្លិប​ Manchester United ​​បាន​លើក​ឡើង​ថា នេះ​ប្រហែល​ជា​ពេល​​​​​ដ៏​ត្រឹម​ត្រូវ​​ដែល​ Paul Pogba ​​ត្រូវ​ចាក​ចេញ​ពី​ក្លិប​បិសាច​ក្រហម ទៅ​លេង​នៅ​ក្លិប​ថ្មី។

កីឡាករ​ដែល​មាន​តម្លៃ​ខ្លួន​បំបែក​កំណត់ត្រា​នៅ Old Trafford ​​​បាន​ក្លាយ​ជា​ក្តី​សង្ឃឹម​ដ៏​ខ្លាំង​ក្លា​របស់​អ្នកគាំទ្រ​ កាល​ឆ្នាំ​២០១៦ ប៉ុន្តែ​ជា​ច្រើន​រដូវ​កាល​មក​នេះ Pogba ពុំ​បាន​បង្ហាញ​ទម្រង់​លេង​ល្អ​ ដូច​អ្វី​ដែល​អ្នកគាំទ្រ​រំពឹង​ទុក​នោះ​ទេ។ កីឡាករ​វ័យ​២៩​ឆ្នាំ នឹង​ចប់​កុងត្រា​ជាមួយ Man Utd ​​នៅ​រដូវ​ក្តៅ​នេះ ​​ហើយ​ Rooney ​​យល់​ថា នេះ​ជា​ពេល​ដែល​រូប​គេ​ត្រូវ​​​ចាក​ចេញ​ហើយ។

អតីត​ខ្សែ​ប្រយុទ្ធ​ជម្រើស​ជាតិ​អង់គ្លេស បាន​ប្រាប់​ដល់ Sky Sports ​​ថា៖ “ខ្ញុំ​គិត​ថា​ឥឡូវ​នេះ គឺជា​ពេល​ដ៏​ស័ក្តិសម ហើយ​ប្រហែល​ជា​ការ​ល្អ​ជាង ដែល​គាត់​​​ទៅ​កន្លែង​ផ្សេង។ ខ្ញុំ​បាន​មើល​គាត់​លេង​ឱ្យ​ជម្រើស​ជាតិ​បារាំង គឺ​ពិត​ជា​​ខុស​ប្លែក​គ្នា។ សមត្ថភាព​របស់​គាត់ ចក្ខុវិស័យ និង​ការ​គ្រប់គ្រង​បាល់ គឺ​ល្អ​ណាស់​សម្រាប់​ជម្រើស​ជាតិ​បារាំង។ ប៉ុន្តែ​វា​ហាក់​ដូច​ជា​មិន​ដំណើរការ​ ពេល​គាត់​នៅ Man Utd។ ខ្ញុំ​គិត​ថា មាន​កីឡាករ​ពីរ​បី​នាក់​ ដែល​ត្រូវ​តែ​ចាក​ចេញ”៕

ប្រភព៖ Goal

  • ភ្ជាប់ទំនាក់ទំនងជាមួយ SPORTREFRESH