ទេស សម្បត្តិ និង លឹម ពិសុទ្ធ អាចជាពីរបួសទាន់ស៊ីហ្គេម ខែក្រោយនេះទេ?

ទេស សម្បត្តិ និងលឹម ពិសុទ្ធ ដែលជាកម្លាំងសំខាន់ក្នុងក្រុមជម្រើសជាតិ​អាយុក្រោម ២៣ឆ្នាំកម្ពុជា សុទ្ធតែជួបបញ្ហារបួសដូចគ្នា នារយៈពេលចុងក្រោយនេះ។ តើកីឡាករ​ទាំង២ អាចជាពីរបួស ទាន់ព្រឹត្តិការណ៍ស៊ីហ្គេម លើកទី៣១ នៅទីក្រុងហាណូយ ប្រទេសវៀតណាម ខែក្រោយនេះដែរឬទេ?

តាមការចុះផ្សាយរបស់ Cambodia 2023 បានឲ្យដឹងថា ទេស សម្បត្តិ មិនអាច​ជាសះស្បើយ ទាន់ស៊ីហ្គេមឆ្នាំនេះនោះទេ។ ខ្សែការពារ វ័យ២២ឆ្នាំ បានឲ្យដឹងថាខ្លួន​នឹងត្រូវសម្រាកប្រហែលជាលើស ៣សប្ដាហ៍ទៀត គ្រាដែលស៊ីហ្គេម ២០២២ នឹងមកដល់នៅអំឡុង ២សប្ដាហ៍ខាងមុខនេះ ដែលជាហេតុធ្វើឲ្យរបួស​ពុំអាចជាសះស្បើយទាន់ពេលវេលាឡើយ។

កីឡាកររបស់ក្លិបវិសាខារូបនេះបានរៀបរាប់ទាំងសោកស្ដាយថា ៖«ខ្ញុំពិតជាសោកស្ដាយណាស់ ព្រោះវាជាស៊ីហ្គេម ចុងក្រោយសម្រាប់ខ្ញុំផង។ គោលដៅខ្ញុំគឺតាំងពីចប់ពានស៊ីហ្គេម លើកមុនម្ល៉េះ ហើយវាជាគោលដៅធំសម្រាប់អាជីពរបស់ខ្ញុំដែរ។​​ ខ្ញុំរឹតតែចង់លេងពានមួយនេះ បន្ទាប់ពីខ្ញុំបានចាញ់ទីម័រខាងកើត ពេលលេងក្នុងទឹកដីខ្លួនឯង។ ខ្ញុំឈឺចាប់ចំពោះអ្នកមើលងាយប្រទេសរបស់ខ្ញុំ និងអ្នកស្អប់រូបខ្ញុំផ្ទាល់ ហើយខ្ញុំតាំងចិត្តថានឹងធ្វើអោយគេស្គាល់ពីអ្វីដែលខ្ញុំមាន និងប្ដូរការគិតរបស់ពួកគេ ប៉ុន្តែជាអកុសលដោយសាររបួស ធ្វើអោយខ្ញុំបាត់បង់ឱកាស។ តែខ្ញុំនៅតែជឿជាក់ថា ពួកគេនឹងធ្វើបានសម្រាប់ការ​ប្រកួតខាងមុខ សំណាងល្អអ្នកទាំងអស់គ្នា»។

ចំណែក លឹម ពិសុទ្ធ វិញ បានប្រាប់ថារបួសរបស់ខ្លួន​ ជិតជាសះស្បើយហើយ ពោលគឺអាចជាទាន់ការប្រកួត​ស៊ីហ្គេម។ កីឡាករវ័យ ២០ឆ្នាំរូបនេះ បានប្រាប់​ថា ៖«ខ្ញុំបានចូលហាត់វិញហើយ ដោយគិតមកទល់ពេលនេះគឺ​ធូរស្បើយ​ប្រហែល​៩០%​ដែរហើយ។ ខ្ញុំប្រហែលជាអាចចូលលេងវិញបាននៅសប្ដាហ៍នេះ តែអាស្រ័យលើគ្រូបង្វឹក គាត់ដាក់លេង ឬមិនដាក់»។

ដំបូង​ឡើយ លឹម ពិសុទ្ធ មិនរំពឹងថា រូបគេ​អាចចូលរួម​ក្នុង​ព្រឹត្តិការណ៍​កីឡា​ស៊ីហ្គេម ឆ្នាំ២០២២ នៅវៀតណាម ដែលគ្រោងចាប់ផ្ដើមដើមខែក្រោយនោះទេ ប៉ុន្តែយោងលើស្ថានភាពពេលនេះ រូប​គេ​ហាក់មានសង្ឃឹមខ្លះៗថា អាចនឹងមានឱកាសជាប់ទៅលេងស៊ីហ្គេម ជាលើកដំបូងក្នុងអាជីពរបស់ខ្លួន។

ពេល​ចោទសួរថា តើរបួសនេះអាចនឹងជាសះ​ស្បើយ​ទាន់កីឡា​ស៊ីហ្គេម នៅប្រទេសវៀតណាមដែរឬទេ? កីឡាករដែលបង្ហាញខ្លួនបា​ន​៩ដងឲ្យជម្រើសជាតិកម្ពុជា​ក្រុម​ធំរូបនេះ បានឆ្លើយតបយ៉ាងដូច្នេះថា ៖«បាទ! ខ្ញុំគិតថា ប្រហែលជាអាចនឹងទាន់ ព្រោះឥឡូវ​នេះ ខ្ញុំចូលហ្វឹកហាត់ជាមួយក្រុមវិញបានហើយ»៕

ប្រភព៖ Cambodia 2023

  • ភ្ជាប់ទំនាក់ទំនងជាមួយ SPORTREFRESH