ខ្សែប្រយុទ្ធ Liverpool កីឡាករ Mohamed Salah និយាយថារូបគេនឹងនៅកីឡដ្ឋាន Anfield នៅរដូវកាលក្រោយសម្រាប់ប្រាកដ ប៉ុន្តែនឹងមិនត្រូវបានគេអូសទាញថាតើគាត់នឹងចុះហត្ថលេខាលើកិច្ចសន្យាថ្មី។

កិច្ចព្រមព្រៀងរបស់ Salah នឹងបញ្ចប់នៅខែមិថុនា ឆ្នាំ២០២៣ ដែលនាំឱ្យមានការរំពឹងទុកថារូបគេអាចត្រូវបានលក់ ប្រសិនបើគាត់មិនចុះហត្ថលេខាលើកិច្ចសន្យាថ្មី ខណៈដែលគាត់នឹងចាកចេញដោយមិនគិតថ្លៃក្នុងរយៈពេលមួយឆ្នាំ។

នៅពេលសួរអំពីអនាគតរបស់គាត់មុនការប្រកួតវគ្គផ្តាច់ព្រ័ត្រ Champions League នៅថ្ងៃសៅរ៍ គាត់បាននិយាយថា៖«ខ្ញុំមិនចង់និយាយអំពីរឿងនោះទេ។ ខ្ញុំគ្រាន់តែចង់ឃើញ Hendo (Jordan Henderson) ជាមួយនឹងពានរង្វាន់»។

ខ្សែ​ប្រយុទ្ធ​អេហ្ស៊ីប​វ័យ​២៩​ឆ្នាំ​បាន​បន្ថែម​ថា៖«ខ្ញុំ​មិន​ផ្តោត​លើ​កិច្ច​សន្យា​នៅ​ពេល​នេះ​ទេ។​ ខ្ញុំ​មិន​ចង់​មាន​ភាព​អាត្មានិយម​ទេ។ ខ្ញុំ​នឹង​បន្ត​នៅ​រដូវ​កាល​ក្រោយ​ជាក់​ជា​មិន​ខាន»។

មិត្តរួមក្រុមរបស់ Salah កីឡាករ Sadio Mane បាននិយាយថារូបគេនឹងប្រកាសពីការសម្រេចចិត្តអំពីអនាគត បន្ទាប់ពីការប្រកួតចុងក្រោយជាមួយនឹង Real Madrid ក្នុងទីក្រុងប៉ារីស។

កីឡាករអន្តរជាតិសេណេហ្គាល់ ទាត់បញ្ចូលទីបាន ១២០ គ្រាប់ក្នុង ២៦៨ ប្រកួតសម្រាប់ Liverpool នោះនឹងចូលលេងរយៈពេល ១២ ខែចុងក្រោយនៃកិច្ចសន្យាចាប់ពីខែមិថុនា។

រូបគេបានប្រាប់ Sky Sports News៖«សំណួរនេះ(អំពីអនាគតរបស់ខ្ញុំ) ខ្ញុំនឹងឆ្លើយបន្ទាប់ពី Champions League។ ប្រសិនបើខ្ញុំនៅឬអត់ ខ្ញុំនឹងឆ្លើយបន្ទាប់ពី(Champions League)»។

គ្រូបង្វឹក Liverpool លោក Jurgen Klopp បានច្រានចោលការលើកឡើងថា លទ្ធផលនៃការប្រកួតកាលពីថ្ងៃសៅរ៍នឹងក្លាយជាកត្តាមួយថាតើកីឡាករមួយចំនួនសម្រេចចិត្តបន្តកិច្ចសន្យារបស់ពួកគេ ឬអត់។

លោក​បាន​មាន​ប្រសាសន៍​ថា៖«ទេ! មិន​មែន​ទាល់​តែ​សោះ។ ចុះ​បើ​យើង​ឈ្នះ​គេ​ចង់​ទៅ?​ យើង​កំពុង​ពិភាក្សា​ជាមួយ​កីឡាករ​ទាំង​អស់​ វា​មិន​មែន​ជា​ពេល​វេលា​ដែល​ត្រូវ​និយាយ​អំពី​លទ្ធផល​នៃ​ការ​ចរចា​ទាំង​នេះ​ទេ។​ គ្មាន​អ្នក​ណា​ម្នាក់​អង្គុយ​នៅ​ទីនោះ​ដោយ​មិន​ដឹង​ថា​យើង​មាន​គម្រោង​អ្វី​ទេ»។

«អត់ទាន់មានពេលទេ យើងលេងបីថ្ងៃម្តង កីឡាករមានគំនិតនេះ យើងមានគំនិតនេះ ពេលខ្លះត្រូវគ្នាភ្លាមៗ ពេលខ្លះអត់បាន ហើយយើងធ្វើការជាមួយគ្នា។ យើង​ស្គាល់​គ្នា​ជា​យូរ​មក​ហើយ»។

Salah បានផ្ទេរពី Roma ក្នុងឆ្នាំ២០១៧ ហើយរកបាន ១៥៦ គ្រាប់ក្នុង ២៥៣ ប្រកួតឲ្យ Liverpool។

រូបគេបានជួយក្លិបឈ្នះ Premier League ក្នុងឆ្នាំ២០១៩-២០, Champions League ២០១៩, FA Cup និង League Cup នៅរដូវកាលនេះ បូករួមទាំង FIFA Club World Cup និង UEFA Super Cup កំឡុងពេលនៅកីឡដ្ឋាន Anfield។

កាលពីខែមីនា Klopp បាននិយាយថា វាអាស្រ័យលើ Salah ថាតើគាត់ចុះកុងត្រាថ្មីឬអត់។

អតីតខ្សែប្រយុទ្ធ Chelsea រូបនេះធ្លាប់បាននិយាយថាគាត់ចង់នៅ ប៉ុន្តែអនាគតរបស់គាត់គឺស្ថិតនៅក្នុងដៃ Liverpool៕

ប្រភព៖ BBC

អត្ថ​បទ​ទាក់​ទង