​​តម្រុយ​ដោះ​ដូរ​​គ្រូ​បង្វឹក​​ល្បីៗ​នៅ​តំបន់​អឺរ៉ុប Zidane, Allegri, Lampard,Rafa Benitez…

មិន​​ថា​តែ​កីឡាករ​ទេ សូម្បី​គ្រូបង្វឹក​​ក៏​មាន​កា​រ​ផ្លាស់​ប្ដូរ​ច្រើន​គួរ​ឲ្យ​កត់​សម្គាល់​ផង​ដែរ​រដូវ​កាល​ក្រោយ​។ ​ថ្មីៗ​នេះ​មាន​លេច​លឺ​​ច្រើន​ណាស់​​សម្រាប់​គ្រូ​បង្វឹក​ដែល​មិន​ទាន់​មាន​ក្លិប​កាន់ និង គ្រូ​បង្វឹក​ត្រូវ​ប្ដូ​រ​ទ្រនំ។

អ្នក​ចាត់​ការ​ស្ដេច​ស Zinedine Zidane ត្រូវ​បាន​គេ​រាយការណ៍​ថា​ទៅ​ដឹក​នាំ Juventus វិញ​ម្ដង​នា​រដូវ​កាល​ក្រោយ បន្ទាប់​ពី​ប្រកាស​ចាក​ចេញ​ពី Real Madrid កាល​ចុង​សប្ដាហ៍​មុន។ Zidane ធ្លាប់​លេង​នៅ Juventus ​៥ ឆ្នាំ​ពីរ​ឆ្នាំ ១៩៩៦ ដល់ ២០០១ មុន​ចាក​ចេញ​ទៅ Real Madrid។

លោក Massimiliano Allegri ដែល​ជា​អតីត​គ្រូ​បង្វឹក Juventus ​​​មាន​ភាគ​រយ​ច្រើន​ជាង​គ្រូ​យុវជន​ Raul Gonzalez ដើម្បី​មក​ជំនួស​តំណែង Zidane ​​ក្នុង​នាម​ជា​គ្រូ​បង្វឹក​ថ្មី Real Madrid។ នេះ​បើ​​តាម​ការ​ចុះ​ផ្សាយ​របស់ Marca។

Frank Lampard ដែល​ជាង​អតីត​គ្រូ​បង្វឹក Derby County និង Chelsea មាន​ភាគរយ​ខ្ពស់​ក្នុង​​ការ​ក្លាយ​ជា​អ្នក​ចាត់​​ការ​ថ្មី​របស់ Crystal Palace ដំនួស​លោក Roy Hodgson ដែល​ផុត​កុង​ត្រា​រដូវ​ក្ដៅ​នេះ។

 

លោក Raul ដែល​ជា​គ្រូ​យុវជន​របស់ Real Madrid ទទួល​​សំណើ​ពី​ក្លិប​ Eintracht Frankfurt ​​ដើម្បី​ក្លាយ​ជា​អ្នក​ចាត់ការ​​ក្លិប​នៅ​អាល្លឺម៉ង់​មួយ​នេះ ប៉ុន្តែ រូប​​លោក​​កំពុង​ស្ថិត​ក្នុង​ពិចារណា​នៅ​ឡើយ។

Ryan Mason គ្រាន់​តែ​គ្រូ​យុវជន និង ជា​គ្រូ​បណ្ដោះ​អាសន្ន​សម្រាប់ Spurs រហូត​ចប់​​​រដូវ​ក្ដៅ​នេះ។ កន្លង​ទៅ​ប្រធាន​ក្លិប​ចាប់​អារម្មណ៍​លើ​លោក​ Julian Nagelsmann គ្រូ​បង្វឹក Leipzig ប៉ុន្តែ លោក​ទទួល​ការងារ​នៅ Bayern ហើយ​រដូវ​កាល​ក្រោយ។

បេក្ខភាព​នាក់​ដែល​អាច​ចូល​កាន់​តំណែង​នៅ Spurs រួមមាន Brendan Rodgers  (គ្រូ Leicester City បច្ចុប្បន្ន​និង​ទើប​ជួយ​ក្រុមឈ្នះ FA Cup), លោក Nuno Espirito Santo (គ្រូ​បង្វឹក​របស់ Wolves ប​ច្ចុប្បន្ន), លោក Maurizio Sarri (អតីត​គ្រូ​បង្វឹក Juventus, Chelsea និង Napoli), លោក Rafa Benitez (អតី​គ្រូ​ Real, Liverpool និង Newcastle), និង​ ចុង​ក្រោយ​មាន Scott Parker (គ្រូ​ Fulham បច្ចុប្បន្ន)៕

 

 

ដោយ SR

  • ភ្ជាប់ទំនាក់ទំនងជាមួយ SPORTREFRESH