ជូន​ពរ​នារីខ្មែរស្រស់ស្អាតកាត់អាមេរិក Tubbs និង វ៉ា មិថុនា ជោគជ័យក្នុង​ការ​ប្រកួតជម្រុះអូឡាំពិក

កីឡាការិនី​តេក្វាន់ដូ​ជម្រើស​ជាតិ​កម្ពុជា​កាត់​អាមេរិក Casandre Tubbs និង​កីឡាករ វ៉ា មិថុនា បាន​កំពុង​ធ្វើ​ដំណើរ​ទៅ​​ប្រទេស​ហ្ស៊កដានី​ដើម្បី​ចូល​រួម​ប្រកួត​វគ្គ​ជម្រុះ​ទទួល​បាន​កៅអី​ទៅ​ចូល​រួម​ប្រកួត​ព្រឹត្តិការណ៍​កីឡា​អូឡាំពិក​រដូវ​ក្តៅ​នៅ​ប្រទេស​ជប៉ុន។

កីឡាការិនី​ខ្មែរ-កាត់​អាមេរិក​Tubbs

សម្រាប់​​ការ​បញ្ជូន​អត្តពលិក​ទៅ​ចូល​រួម​ប្រកួត​ព្រឹតឹ្តការណ៍​កីឡា​អូឡាំពិក​ត្រូវ​បាន​បែង​ចែក​ពីរ​ប្រភេទ។ ទី​១​គឺទទួល​បាន​ការ​អនុគ្រោះ​ដោយ​បញ្ជូន​អត្តពលិក​ប្រភេទ​កីឡា​សំខាន់​ដូច​ជា រត់ប្រណាំង និង​ហែល​ទឹក​ទៅ​ចូល​រួម​ដោយ​មិន​ចាំ​បាច់​ធ្វើ​ការ​ប្រកួត​ជម្រុះ​សម្រាប់​ប្រទេស​ជា​សមាជិក​អូឡាំពិក​នីមួយ​ៗ។

កីឡាករ វ៉ា មិថុនា

ទី​២ គ្រប់ប្រភេទ​កីឡា​ផ្សេង​ៗ​ទៀត ប្រទេស​នីមួយ​ៗ​ត្រូវ​តែ​ធ្វើ​ការ​ប្រកួត​ជម្រុះ​តៅ​តាម​តំបន់ និង​ទ្វីប​នីមួយ​ៗ​តាម​ការ​កំណត់​របស់​គណៈកម្មាធិការ​អូឡាំពិក​អន្តរជាតិ ហើយ​ទទួល​បាន​កៅអី​ទើប​មាន​សិទ្ធិ​បញ្ជូន​ទៅ​ចូល​រួម​ប្រកួត។

លោក Choic គ្រូ​បង្វឹក​តេក្វាន់ដូ​ជម្រើស​ជាតិ​កម្ពុជា

សម្រាប់​កីឡាការិនី​កម្ពស់​ខ្ពស់​កាត់​ខ្មែរ-អាមេរិក Casandre Tubbs និង​កីឡាករ វ៉ា មិថុនា ជា​អត្តពលិក​តេក្វាន់​ដូ​កម្ពុជា​ពីរ​នាក់​ប៉ុណ្ណោះ​ដែល​បាន​ចូល​រួម​ប្រកួត​វគ្គ​ជម្រុះ​កម្រិត​ទ្វីប​​អាស៊ី​នេះ។ កម្ពុជា​មិន​បាន​ដាក់​ប្រភេទ​កីឡា​ច្រើន​ដើម្បី​ចូល​រួម​ប្រកួត​ជម្រុះ​កម្រិត​អូឡាំពិក​ឡើយ ពីព្រោះ​កម្រិត​សមត្ថភាព​កីឡា​កម្ពុជា​មាន​ច្រើន​ដែល​មាន​កម្រិតទាប​នៅ​ឡើយ។

កីឡាការិនី ស៊ន សៀវម៉ី

សូម​បញ្ជាក់​ថា កីឡាការិនី​តេក្វាន់ដូ ស៊ន សៀវភៅ ជាអត្តពលិក​កម្ពុជា​ទី​១​ដែល​បាន​ប្រកួត​វគ្គ​ជម្រុះ​ព្រឹត្តិការណ៍​កីឡា​អូឡាំពិក​ឆ្នាំ​២០១៦ ហើយ​ពេល​នោះ​នាង​ទទួល​បាន​ចំណាត់​ថ្នាក់​លេខ​១ និង​បាន​ចូល​រួម​ប្រកួត​អូឡាំពិក​ជា​អត្តពលិកពេញ​សិទ្ធិ។

ការ​ប្រកួត​វគ្គ​ជម្រុះ​ទ្វីប​អាស៊ី នៅ​ប្រទេស​ហ្សក់ដានី នឹង​​ធ្វើ​រយៈ​ពេល​២​ថ្ងៃ​គែឺ ថ្ងៃ​ទី​២១-២២ ខែ​ឧសភា។ ចំណែក​ព្រឹត្តិការណ៍​កីឡាអូឡាំពិក​ដែល​ប្រទេស​ជប៉ុន​ធ្វើ​ម្ចាស់​ផ្ទះ​បាន​លើក​ពេល​ពី​ឆ្នាំ​២០២០ មក​ធ្វើ​នៅ​ឆ្នាំ​២០២១​​ដោយសារ​កូវីដ-១៩​ដែល​តាម​គ្រោង​ទុក​នឹង​បើក​ការ​ប្រកួត​ថ្ងៃ​ទី២៣ ខែ​កក្កដា នៅ​ទី​ក្រុង​តូក្យូ៕

 

  • អត្ថ​បទ​ទាក់​ទង

    ភ្ជាប់ទំនាក់ទំនងជាមួយ SPORTREFRESH