គ្រូបង្ហាត់ប្រដាល់មួយចំនួនបានរអ៊ូថា សិស្សរបស់ពួកគាត់មួយចំនួនលែងមានអារម្មណ៍ខំប្រឹងហ្វឹកហាត់ទៀតហើយ ដោយសារតែមិនសូវទទួលបានឱកាសឡើងប្រកួត ដូច្នេះការហ្វឹកហាត់ហាក់ដូចជាអត់ប្រយោជន៍។
លោកគ្រូ សួង បញ្ញា ដែលជាអតីតកីឡាករប្រដាល់ម្នាក់បាននិយាយថា សិស្សរបស់លោករត់ចោលគាត់ស្ទើរអស់ហើយ ពីព្រោះពួកគាត់គ្មានកន្លែងបញ្ចេញសមត្ថភាព។ នេះឬគុនខ្មែរ។ បើដឹងថា លំបាកបែបនេះ លោកមិនធ្វើទេរឿងកីឡា។
(លោកគ្រូ សូង បញ្ហា និងកូនសិស្សដែលបានឱកាសឡើងប្រកួត)
លោកថា ៖«ចង់ចូលរួមអភិរក្ស ដូចគេឯងដែរ។ បើកក្លឹបយកលុយខ្លួនឯងមិនស្តាយទេ តែស្តាយសមត្ថភាពរបស់ពួកគាត់។ តើអនាគត និងវាសនាក្លឹប អភិរក្សគុនខ្មែររុងរឿង ទៅជាយ៉ាងណា? តើខ្ញុំត្រូវទ្រាំដល់ណា? ប្រាប់ពីរខែហើយ មិនបានប្រកួត ទៅធ្វើសំណង់ទៅ គ្រាន់បានលុយខកលះ។ ព្រោះយើងមិនចូលរួមជាមួយគេបានទេ»។
ចំណែកលោក ឡុង វិបុល ជាគ្រូបង្ហាត់ប្រដាល់ និងជាអាជ្ញាកណ្តាលម្នាក់បានរៀបរាប់ថា ៖«ថ្ងៃខ្ញុំឆ្ងល់ខ្លាំងណាស់ ចំពោះអ្នកចាប់គូប្រកួតប្រដាល់គុនខ្មែរនៅស្ថានីយ៍មួយ។ ពេលខ្ញុំដាក់ឈ្មោះកីឡាករ (ខ) ខាងចាប់គូសួររកកីឡាករ (ក) ដល់ពេលដាក់ឲ្យទាង (ខ) និង(ក) គេឆ្លើយថា ពេញអស់ហើយសម្លាញ់។ រឿងមួយទៀត ខ្ញុំកាន់តែឆ្ងល់មែនទែន ចំពោះក្លឹប២ នៅកម្មវិធីប្រដាល់គុនខ្មែរ សប្តាហ៍មួយណាក៏ប្រកួតដែរ មានតែឈ្មោះក្លឹបទេ ដើរយក និងខ្ចីកីឡាករគេមកប្រកួតទេ ប៉ុន្តែខាងម្ចាស់កីឡាករបានផលចំណេញច្រើន។ ទី១ កីឡាករគេបានឡើងប្រកួតដើម្បីបញ្ចេញបច្ចេកទេសនៅលើសង្វៀន»។
លោកបានបន្តថា ៖«ចុះបើក្លឹបផ្សេងៗមិនជួយដាក់ឲ្យបានប្រកួត និងជួយបណ្តុះបណ្តាលឲ្យមានភាពរីកចម្រើនផង។ ចាប់តាំងពីតែដូរអ្នកចាប់គូថ្មីមក តើគេនាំគ្នាគិតតែផលប្រយោជន៍ផ្ទាល់ខ្លួនមែន? ចុះចំណែកអ្នកខំបង្កើតក្លឹបបង្ហាត់សិស្សជាក់ស្តែង តើត្រូវគិតយ៉ាងណា?
ជាមួយគ្នាគ្រូបង្ហាត់ប្រដាល់ក្លឹបប្រដាល់សុវណ្ណកុមារគុនខ្មែរបានរៀបរាប់ថា ៖«ខ្ញុំបាទជាគ្រូបង្ហាត់នៅក្លឹបប្រដាល់សុវណ្ណកុមារគុនខ្មែរ ជាងមួយឆ្នាំហើយអត់ទាន់បានអជ្ញាប័ណ្ណ ពីសហព័ន្ធប្រដាល់គុនខ្មែរនៅឡើយទេ។ សង្ឃឹមថា ឯកឧត្តម តែម ម៉ឺន ប្រធានសហព័ន្ធកីឡាប្រដាល់គុនខ្មែរ នឹងចេញអាជ្ញាប័ណ្ណឲ្យខ្ញុំ ដើម្បីឲ្យខ្ញុំបានបណ្ដុះបណ្តាលពន្លកគុនខ្មែរបន្តទៀតថ្ងៃពុធ ទី២ ខែមិថុនា ឆ្នាំ ២០២១»។
(ក្លឹបសុវណ្ណកុមារគុនខ្មែរកំពុងហ្វឹកហាត់)
មែនទែនទៅ ចាប់តាំងពីរដ្ឋាភិបាលអនុញ្ញាតឲ្យមានការប្រកួតបិទទ្វារ និងគ្មានកីឡាករបរទេសមកប្រកួតកាលពីខែមេសា ឆ្នាំ២០២០ សហព័ន្ធកីឡាប្រដាល់គុនខ្មែរត្រូវការកីឡាករគុនខ្មែរឡើងប្រកួតរាល់សប្តាហ៍ច្រើនណាស់ និងមិនមានកីឡាករគ្រប់គ្រាន់ដើម្បីឡើងប្រកួតឡើយ។
ដោយសារខ្វះកីឡាករ ទាំងសហព័ន្ធ និងម្ចាស់កម្មវិធីទូរទស្សន៍មួយចំនួនបង្ខំចិត្តដាក់កីឡាករដដែលៗឲ្យឡើងប្រកួត។ កីឡាករខ្វះឡើងប្រកួតស្ទើរគ្មានបាត់មុខមួយសប្តាហ៍ឡើយពោលគឺអ្នកខ្លះបានប្រកួត២ដង ៣ដង ឬ៤ដងក៏មានក្នុងមួយ។ វិលចុះវិលឡើងកីឡាករជួបគ្នាដដែលឡើងធ្វើឲ្យអ្នកគាំទ្រធុញទៅហើយព្រោះឃើញពួកគេជួបគ្នាដដែលៗញឹកញាប់ពេក។
(ក្លឹបសុវណ្ណកុមារគុនខ្មែរកំពុងហ្វឹកហាត់)
ប្រការបែបនេះ ទាំងសហព័ន្ធ និងកម្មវិធីប្រកួតពិតជារីករាយណាស់ ប្រសិនបើបានកីឡាករថ្មីៗ ល្អឡើងប្រកួតដើម្បីជៀសវាងការផ្គូផ្គងកីឡាករដដែលពេក។ ផ្ទុយទៅវិញ បែរជាគ្រូបង្ហាត់មួយចំនួនត្អួញត្អែរថា សិស្សរបស់ពូកគាត់មិនបានឡើងប្រកួតទៅវិញ។ បញ្ហាចោទលើកឡើងថា តើមកពីបញ្ហាអ្វី?
បើតាមលក្ខន្តិកៈរបស់សហព័ន្ធកីឡាប្រដាល់គុនខ្មែរគឺ ក្លឹបមួយត្រូវបានទទួលស្គាល់ដោយសហព័ន្ធកីឡាប្រដាល់គុនខ្មែរបានទាល់តែបំពេញតាមលក្ខខណ្ឌមួយចំនួនដូចជាទីតាំងច្បាស់លាស់ មានសម្ភារៈហ្វឹកហាត់ គ្រូបង្ហាត់ ឈ្មោះ ឡូហ្គោ និងរចនាសម្ព័ន្ធថ្នាក់ដឹកនាំជាដើម។
រាល់កីឡាករដែលត្រូវបានបញ្ជូនឡើងប្រកួតនៅលើសង្វៀនសុទ្ធតែចេញពីក្លឹបដែលទទួលស្គាល់ដោយសហព័ន្ធកីឡាប្រដាល់គុនខ្មែរ។ បើកីឡាករណាម្នាក់មានសមត្ថភាព តែគ្មានក្លឹប ឬក្លឹបមិនមានឈ្មោះទទួលស្គាល់ដោយសហព័ន្ធទេគឺមិនអាចឡើងប្រកួតកម្មវិធីផ្លូវការបានទេ។
ម្យ៉ាងទៀត មួយរយៈពេលចុងក្រោយនេះ វិបត្តិកូវីដ-១៩បានវាយប្រហារខ្លាំងនៅទីក្រុងភ្នំពេញដែលជំរុញឲ្យសង្វៀនប្រដាល់ខ្លះបានផ្អាកដំណើរការប្រកួត ដូច្នេះចង់ឬមិនចង់ កីឡាករត្រូវតែអត់បានឡើងប្រកួតហើយ។
ទោះបីជាយ៉ាងណា បន្ទាប់ពីគ្រូខ្លះបានបង្ហាញជាសាធារណៈតាមបណ្តាញទំនាក់ទំនងសង្គមហ្វេសប៊ុក កីឡាកររបស់ពួកគាត់ខ្លះកំពុងត្រូវបានចាត់ចែងឲ្យឡើងប្រកួតហើយ៕
