ក្លិបហង្សក្រហម Liverpool កំពុងចាប់អារម្មណ៍លើខ្សែបម្រើជម្រើសជាតិអ៊ីតាលី Lorenzo Insigne ខណៈដែលពេលនេះម្ចាស់ក្លិប Napoli លោក Aurelio De Laurentiis ក៏នឹងអនុញ្ញាតឱ្យកីឡាកររូបនេះ ចាកចេញពីក្លិបបាន។
សារព័ត៌មាន Corriere dello Sport បានឱ្យដឹងថា Insigne វ័យ៣០ឆ្នាំ នៅជាប់កុងត្រាជាមួយ Napoli តែមួយឆ្នាំទៀតប៉ុណ្ណោះ ហើយពុំមានការព្រមព្រៀងលើកិច្ចសន្យាថ្មីជាមួយក្លិបនៅ Serie A មួយនេះទេ។ កីឡាកររូបនេះ បច្ចុប្បន្នមានតម្លៃខ្លួនប្រហែល ២៥លានអឺរ៉ូ (២១,៣លានផោន) ហើយ Liverpool កំពុងគ្រោងដេញថ្លៃ ខណៈដែលអ្នកចាត់ការ Jurgen Klopp កំពុងត្រូវការខ្សែបម្រើបន្ថែម។
Insigne បានលេងដល់កម្រិតកំពូលជាច្រើនឆ្នាំមកហើយឱ្យក្រុម Napoli ដោយបង្ហាញខ្លួនឱ្យក្រុមនេះសរុបបាន ៣៩៧ប្រកួត និងស៊ុតបាន ១០៩គ្រាប់។ ខ្សែបម្រើល្បឿនលឿនរូបនេះ ក៏ជាតួអង្គដ៏សំខាន់ជួយឱ្យក្រុមជម្រើសជាតិអ៊ីតាលី លើកពាន Euro 2020 ផងដែរ៕
ប្រភព៖ Echos
